हिवाळी वेळापत्रकाचा भाग म्हणून विमानतळावरून फ्लाय ९१ ची विमानसेवा सुरु
नवी मुंबई हे फ्लाय ९१ चे १४ वे देशांतर्गत आणि महाराष्ट्रातील बनले ५ वे स्थानक
नवी मुंबई : फ्लाय९१ या गोवास्थित प्रादेशिक विमानसेवेने नवी मुंबई आंतरराष्ट्रीय विमानतळावरून गोवा, सिंधुदुर्ग आणि जळगावसाठी आपली विमानसेवा सुरू केली आहे. ५ ऑक्टोबर रोजी या कंपनीच्या विमानाने नवी मुंबई विमानतळावर आपले पहिले लँडिंग केले. विशेष म्हणजे, या विमानाची संपूर्ण धुरा महिला कर्मचाऱ्यांनी सांभाळली होती. विमानतळावर या पहिल्या विमानाचे पारंपरिक ‘वॉटर कॅनन सॅल्युट’ (पाण्याची सलामी) देऊन शानदार स्वागत करण्यात आले.
या नवीन विमान सेवांमुळे नवी मुंबई आता महाराष्ट्र, पश्चिम किनारपट्टी आणि लक्षद्वीप बेटांमधील प्रमुख ठिकाणांशी थेट जोडली जाईल. यामुळे प्रवाशांसाठी पर्यटन, व्यापार आणि प्रादेशिक प्रवासाच्या अधिक सोयीस्कर संधी उपलब्ध होतील. या नव्या मार्गांमुळे उदयोन्मुख देशांतर्गत बाजारपेठांशी नवी मुंबई विमानतळाची ‘कनेक्टिव्हिटी’ अधिक भक्कम होईल. तसेच, मुंबई महानगर प्रदेशाचे (MMR) प्रमुख प्रवेशद्वार म्हणून या विमानतळाचे महत्त्व लक्षणीयरीत्या वाढेल, असा विश्वास यावेळी फ्लाय९१ विमान कंपनीकडून व्यक्त करण्यात आला.
‘फ्लाय९१’ (FLY91) च्या नकाशावर आता नवी मुंबईही झळकणार आहे! हे या विमान कंपनीचे देशातील १४ वे, तर महाराष्ट्रातील ५ वे डेस्टिनेशन ठरेल. आगामी हिवाळी वेळापत्रकानुसार, नवी मुंबई विमानतळावरून थेट सिंधुदुर्ग, जळगाव, गोवा (GOX) आणि लक्षद्वीपमधील निसर्गरम्य अगात्तीसाठी नियमित विमानसेवा सुरू करण्यात येणार आहे. “फ्लाय९१ चे आगमन ही नवी मुंबई आंतरराष्ट्रीय विमानतळाच्या वाढत्या एअरलाईन नेटवर्कमध्ये एक अत्यंत महत्त्वाची भर आहे. ज्या चार नवीन ठिकाणांसाठी ते विमानसेवा देत आहेत, ती ठिकाणे पर्यटन आणि प्रादेशिक व्यावसायिक प्रवासाच्या दृष्टीने खूप महत्त्वाची आहेत. आमचे नेटवर्क वेगाने वाढत असताना, प्रवाशांसाठी नवी मुंबईला एक सोयीस्कर गेटवे बनवण्यावर आणि अर्थपूर्ण कनेक्टिव्हिटी निर्माण करण्यावर आमचा भर आहे,” असे नवी मुंबई आंतरराष्ट्रीय विमानतळाचे सीएओ सुभाष मुरिकेंचेरी म्हणाले.
फ्लाय९१ (Fly91) चा नवी मुंबईतील प्रवेश अशा एका महत्त्वपूर्ण टप्प्यावर होत आहे, जेव्हा कंपनी स्वतःच्या विस्तारासाठी मोठी पावले उचलत आहे. या विमान कंपनीने नुकतीच सुमारे १ अब्ज अमेरिकन डॉलर मूल्याच्या ४० ‘ATR 72-600’ विमानांची निश्चित ऑर्डर दिली आहे. २०२७ ते २०३२ या कालावधीत ही विमाने कंपनीच्या ताफ्यात दाखल होण्याची अपेक्षा आहे. या नव्या विमानांमुळे फ्लाय९१ ला आपल्या ताफ्यातील विमानांची संख्या ६ वरून थेट ६० पर्यंत वाढवणे शक्य होणार आहे.
“आर्थिक राजधानीचे प्रवेशद्वार असलेल्या नवी मुंबईत आज ‘फ्लाय९१’चे पहिले विमान उतरले. संपूर्णपणे महिला कर्मचाऱ्यांनी संचालित केलेल्या या उड्डाणात आमचे सुरुवातीपासूनचे गुंतवणूकदार आणि हितचिंतकही सहभागी होते. अडीच वर्षांपूर्वी २ विमाने आणि ३ शहरांपासून सुरू झालेला आमचा प्रवास आज १४ शहरांत आठवड्याला ३५० हून अधिक उड्डाणांपर्यंत पोहोचला आहे, याचा आम्हाला सार्थ अभिमान आहे,” असे फ्लाय९१ चे संस्थापक, व्यवस्थापकीय संचालक आणि सीईओ (CEO) मनोज चाको म्हणाले.
“नवी मुंबई हे फ्लाय९१ च्या नेटवर्कमधील एक महत्त्वाचे स्थानक आहे. हे आमचे १४ वे आणि महाराष्ट्रातील पाचवे गंतव्यस्थान आहे. आम्ही देशाच्या आर्थिक राजधानीला पश्चिम भारतातील उदयोन्मुख बाजारपेठांशी जोडत आहोत. फ्लाय९१ नवी मुंबईहून सिंधुदुर्ग, जळगाव, गोवा आणि अगात्तीसाठी विमाने चालवेल. हवाई प्रवास अधिक सोयीस्कर बनवणाऱ्या आणि खऱ्या अर्थाने ‘भारताला’ जोडणाऱ्या एका व्यावहारिक प्रादेशिक नेटवर्कच्या निर्मितीवर आमचे लक्ष केंद्रित राहील,” ते पुढे म्हणाले
नवी मुंबईच्या समावेशासह, ‘फ्लाय९१’चे (Fly91) नेटवर्क आता १४ शहरांपर्यंत विस्तारले आहे. या विस्तृत नेटवर्कमध्ये गोवा, सिंधुदुर्ग, जळगाव, सोलापूर, पुणे, बंगळुरू, हैदराबाद, अगात्ती, कोची, हुबळी, राजमुंद्री, विजयवाडा, तिरुपती आणि आता नवी मुंबई (NMIA) या ठिकाणांचा समावेश आहे.
२५ डिसेंबर २०२५ रोजी व्यावसायिक ऑपरेशन्स सुरू झाल्यापासून नवी मुंबई आंतरराष्ट्रीय विमानतळाने (NMIA) ३.२ दशलक्ष (३२ लाख) प्रवाशांचा टप्पा ओलांडला आहे. हा वाढता प्रवासी वर्ग भारताच्या या सर्वात नवीन ग्रीनफिल्ड आंतरराष्ट्रीय विमानतळाची प्रगती आणि वाढती कनेक्टिव्हिटी दर्शवतो. सुरुवातीला केवळ १३ ठिकाणांसाठी विमानसेवा सुरू केलेल्या या विमानतळावरून आता देशातील सुमारे ४३ ठिकाणांसाठी विमाने उडतात. ऑपरेशन्स सुरू झाल्यापासून या विमानतळाने २५,२९५ पेक्षा जास्त व्यावसायिक विमानांचे उड्डाण यशस्वीपणे हाताळले आहे. विमानतळाचे विस्तारते नेटवर्क हे मुंबई महानगर प्रदेश आणि पश्चिम भारतासाठी एक प्रमुख एव्हिएशन गेटवे म्हणून त्याची महत्त्वाची भूमिका स्पष्ट करते.
