शैक्षणिक व प्रशासकीय कामकाजाला मिळणार बळ; माजी विद्यार्थी व पालकांचा कौतुकास्पद पुढाकार
कुडाळ : डिजिटल युगातील शिक्षणाच्या गरजा ओळखून माजी विद्यार्थी आणि पालकांनी शाळेच्या विकासासाठी दिलेल्या योगदानाचे कौतुक होत आहे. जिल्हा परिषद पूर्ण प्राथमिक शाळा साळगाव नं. २ येथे शैक्षणिक व प्रशासकीय कामकाज अधिक सक्षम व्हावे, या उद्देशाने माजी विद्यार्थ्यांकडून कॉम्प्युटर आणि ऑफिस टेबल अशी मौल्यवान भेट देण्यात आली.
शाळेचे माजी विद्यार्थी तथा सेवानिवृत्त वर्ग-१ अधिकारी बबन गायचोर यांनी शाळेला कॉम्प्युटर भेट दिला. आजच्या डिजिटल युगात विद्यार्थ्यांना तंत्रज्ञानाधारित शिक्षणाची ओळख होणे गरजेचे आहे. या पार्श्वभूमीवर गायचोर यांनी दिलेला कॉम्प्युटर विद्यार्थ्यांच्या शैक्षणिक उपक्रमांसह शाळेच्या प्रशासकीय कामकाजासाठीही उपयुक्त ठरणार आहे.
तसेच शाळेचे माजी विद्यार्थी व पालक श्री. व सौ. सुवर्णा केशव माळकर यांनी शाळेला ऑफिस टेबल भेट दिले. शाळेच्या कार्यालयीन गरजा लक्षात घेऊन दिलेल्या या योगदानामुळे प्रशासकीय कामकाज अधिक सुलभ होण्यास मदत होणार आहे.
माजी विद्यार्थी आणि पालकांनी शाळेशी असलेले जिव्हाळ्याचे नाते कायम ठेवत शाळेच्या विकासासाठी पुढाकार घेतल्याने त्यांच्या योगदानाचे सर्व स्तरातून कौतुक होत आहे. या दोन्ही भेटींमुळे शाळेच्या सुविधांमध्ये भर पडली असून, विद्यार्थ्यांना अधिक चांगल्या शैक्षणिक सुविधा उपलब्ध होण्यास मदत होणार आहे. यावेळी शाळेचे मुख्याध्यापक, शिक्षकवृंद, शाळा व्यवस्थापन समिती, विद्यार्थी व पालक यांच्या वतीने बबन गायचोर तसेच श्री. व सौ. सुवर्णा केशव माळकर यांचे आभार मानण्यात आले.
“माजी विद्यार्थी व पालकांनी शाळेच्या विकासासाठी दिलेले योगदान हे केवळ वस्तूंचे दान नसून, शाळेच्या उज्ज्वल भविष्यासाठी दिलेला विश्वास आणि आधार आहे,” असे गौरवोद्गार मुख्याध्यापकांच्या वतीने व्यक्त करण्यात आले. भविष्यातही शाळेच्या विकासासाठी माजी विद्यार्थी व पालकांचे असेच सहकार्य मिळत राहावे, अशी अपेक्षा यावेळी व्यक्त करण्यात आली.
