‘जंकफुडासुराचा नाश’ दशावतारी नाटकाने जिंकली उपस्थितांची मने
रानभाज्यांच्या प्रदर्शनासह पाककला स्पर्धेला उत्स्फूर्त प्रतिसाद
कुडाळ : प्रतिनिधी
कृषी तंत्रज्ञान व्यवस्थापन यंत्रणा (आत्मा) सिंधुदुर्ग, तालुका कृषी अधिकारी कार्यालय कुडाळ आणि ग्रामपंचायत आंदुर्ले यांच्या संयुक्त विद्यमाने बुधवारी, दिनांक १२ ऑगस्ट २०२६ रोजी जिल्हा परिषद पूर्ण प्राथमिक शाळा, पाट-आंदुर्ले येथे कुडाळ तालुकास्तरीय रानभाजी महोत्सव अत्यंत उत्साहात आणि नियोजनबद्ध वातावरणात पार पडला.
महोत्सवाची सुरुवात अत्यंत पारंपारिक व उत्साही वातावरणात लेझीम वृक्षदिंडीने आणि उपस्थित मान्यवरांच्या हस्ते वृक्षारोपण करून झाली. या कार्यक्रमाला प्रमुख उपस्थिती म्हणून लाभलेले सिंधुदुर्ग जिल्हा परिषदेचे उपाध्यक्ष तथा कृषी, पशुसंवर्धन व दुग्ध शाळा समिती सभापती तुकाराम उर्फ दादा साईल, जि. प. सदस्या दीपलक्ष्मी पडते, आरती पाटील, रुपेश कानडे, पंचायत समिती माजी सभापती संजय वेंगुर्लेकर, तालुकास्तरीय शेतकरी सल्ला समितीचे अध्यक्ष मंगेश प्रभू, पंचायत समिती सदस्या प्रियांका जळवी, आत्मा सिंधुदुर्गच्या प्रकल्प उपसंचालक प्रगती तावरे, उद्यानविद्या महाविद्यालय मुळदेचे सहयोगी अधिष्ठाता विजय दळवी, कुडाळचे गटविकास अधिकारी प्रवीण हिर्लेकर, तालुका कृषी अधिकारी भास्कर चौगले, आंदुर्लेचे सरपंच अक्षय तेंडोलकर, मंडळ कृषी अधिकारी विजय घोंगे (कुडाळ), गायत्री तेली (माणगाव), तानाजी सगरे (कडावल), सर्व ग्रामपंचायत सदस्य, उप/सहाय्यक कृषी अधिकारी आणि परिसरातील निसर्गप्रेमी शेतकरी बांधव मोठ्या संख्येने उपस्थित होते.
दादा साईल म्हणाले, आपल्या निसर्गाने आणि जंगलांनी आपल्याला समृद्ध असा ठेवा दिला आहे. पावसाळ्यात आपोआप उगवणाऱ्या रानभाज्या केवळ चविष्ट नसून आरोग्य आणि पोषणाचा मोठा स्रोत आहेत. बदलत्या जीवनशैलीमुळे या पारंपरिक आहारापासून नवीन पिढी दुरावत असताना रानभाज्यांचे पुनरुज्जीवन आणि संवर्धन होणे गरजेचे आहे. त्यातून महिला बचत गट आणि शेतकऱ्यांना रोजगाराची नवी संधीही निर्माण होऊ शकते. रानभाज्यांना योग्य बाजारपेठ व भाव मिळवून देण्यासाठी जिल्हा परिषद सहकार्य करेल, असे त्यांनी आश्वासित केले.
महोत्सावातील प्रमुख आकर्षणे आणि उपक्रम:
रानभाजी प्रदर्शन व पाककला: महोत्सवामध्ये स्थानिक रानभाज्यांचे प्रदर्शन, विक्री आणि पंचक्रोशीतील महिलांनी रानभाज्यांपासून बनवलेल्या विविध वैशिष्ट्यपूर्ण पाककृतींची सुबक मांडणी केली होती.
पथनाट्य व स्वागत: जि. प. शाळा आंदुर्लेच्या इयत्ता ६ वी व ७ वीच्या विद्यार्थ्यांनी रानभाजीचे महत्त्व पटवून देणारे पथनाट्य सादर केले. तसेच उद्यानविद्या महाविद्यालय मुळदेच्या विद्यार्थ्यांनी बनवलेल्या नैसर्गिक पुष्पगुच्छांनी मान्यवरांचे स्वागत करण्यात आले.
विशेष दशावतारी प्रयोग: या महोत्सवाचे मुख्य आकर्षण शाळा पाट सावलीच्या भरड शाळेतील विद्यार्थ्यांनी सादर केलेला ‘जंकफुडासुराचा नाश’ हा रानभाजीचे महत्त्व सांगणारा दशावतारी नाट्यप्रयोग ठरला. या आगळ्यावेगळ्या नाटकाने अधिकारी, पदाधिकारी, ग्रामस्थ व विद्यार्थ्यांची मने जिंकली.
तांत्रिक सत्र व मार्गदर्शन: कुडाळ येथील रानभाजी अभ्यासक रामचंद्र शृंगारे यांनी तांत्रिक सत्रात उपस्थितांना रानभाज्यांचे औषधी गुणधर्म आणि विविध पाककृतींबद्दल विस्तृत मार्गदर्शन केले व उपस्थितांच्या शंकांचे निरसन केले.
पुरस्कार व गौरव
पाककला स्पर्धेत सहभागी झालेल्या सर्व महिलांचा मान्यवरांच्या हस्ते प्रमाणपत्र, पुष्पगुच्छ आणि रोख बक्षीस देऊन विशेष गौरव करण्यात आला.
कार्यक्रमाच्या यशस्वीतेसाठी आंदुर्ले शाळेचे मुख्याध्यापक प्रशांत तेंडोलकर व सर्व शिक्षकवृंद यांचे मोलाचे सहकार्य लाभले. तसेच आंदुर्ले गावचे सहाय्यक कृषी अधिकारी सोमकांत आईर यांनी विशेष परिश्रम घेऊन या महोत्सवाचे उत्कृष्ट नियोजन केले.
रानभाज्यांचा हा वारसा आणि आरोग्यदायी महत्त्व जपण्यासाठी तालुका कृषी अधिकारी कार्यालय कुडाळ यांनी केलेल्या या उत्कृष्ट नियोजनाबद्दल सर्व मान्यवर पदाधिकारी, अधिकारी व ग्रामस्थांनी कृषी विभागाचे मनापासून कौतुक व अभिनंदन केले.
