रावे कार्यक्रमांतर्गत उद्योग कार्यपद्धतीचा केला अभ्यास
कुडाळ : रा. कृ. का. (RAWE) कार्यक्रमांतर्गत अणाव गावात कार्यरत असलेल्या छत्रपती शिवाजी कृषी महाविद्यालय, किर्लोस-ओरोस येथील कृषीकन्या अनुजा गिते, सृष्टी राऊळ, दिया पी. व अतुल्या एम. यांनी कुडाळ MIDC येथील माऊली ॲग्रो फूड प्रॉडक्ट्स या कृषी प्रक्रिया उद्योगाला भेट देऊन उद्योगाच्या आर्थिक व व्यावसायिक कार्यपद्धतीचा अभ्यास केला.
भेटीदरम्यान कृषीमालाची प्रक्रिया, कच्च्या मालाची खरेदी व उपलब्धता, उत्पादन प्रक्रिया, दैनंदिन विक्री, ग्राहकांची संख्या व बाजारपेठेतील मागणी याबाबत सविस्तर माहिती घेण्यात आली. तसेच वितरण व्यवस्था, आयात-निर्यात, उत्पादन खर्च, विपणन पद्धती आणि उद्योगाच्या आर्थिक बाबी समजून घेण्यात आल्या.
कृषी उत्पादनाला प्रक्रिया व योग्य बाजारपेठ मिळाल्यास त्यातून अधिक मूल्यनिर्मिती कशी करता येते, याचा प्रत्यक्ष अनुभव या भेटीतून कृषीकन्यांना मिळाला. या भेटीमुळे कृषी प्रक्रिया उद्योगातील आर्थिक नियोजन, विपणन आणि व्यवसाय व्यवस्थापनाची व्यावहारिक माहिती मिळाली.
