गॅरेज परिसरात अग्नीतांडव; लाखोंचे नुकसान
स्थानिक नागरिकांकडून मदतकार्य; लोकप्रतिनिधींची घटनास्थळी धाव
मालवण : प्रतिनिधी
मालवण शहरातील धुरीवाडा येथील काळुजी सदाशिव कांदळगावकर यांच्या रामेश्वर ऑटो गॅरेजच्या ठिकाणी शनिवारी रात्री उशिरा भीषण आग लागली. या आगीत दुरुस्तीसाठी ठेवलेल्या १५ दुचाकी व कांदळगावकर यांची एक कार जळून खाक झाल्याचे समजते.
उपलब्ध माहितीनुसार, रात्री अचानक या गॅरेजला आग लागली. स्थानिकांनी शर्थीचे प्रयत्न करत पाण्याचा मारा करून तसेच नगरपालिकेच्या बुलेट फायरफायटर द्वारे आगीवर नियंत्रण मिळवण्याचे प्रयत्न केले. मात्र भडकलेली आग विझे पर्यत बहुतांश सर्व गाड्या जळून खाक झाल्याने लाखोंचे नुकसान झाले आहे. मात्र नेमके कारण समजू शकले नाही.
नगरपालिकेचा अग्नीशमन बंब दुरुस्तीसाठी असल्याने तो उपलब्ध न झाल्याने नगरपालिकेच्या बुलेट फायरफायटर द्वारे तसेच नागरिक यांच्या अथक प्रयत्नातून आगीवर नियंत्रण मिळवण्याचे प्रयत्न सुरु राहिले. नागरिकांनी जीव धोक्यात घालून मदतकार्य केले. या घटनेची माहिती समजताच नगराध्यक्ष सौ. ममता वराडकर, नगरसेवक मंदार केणी, सुदेश आचरेकर, ललित चव्हाण, स्वच्छता आरोग्य सभापती पूनम चव्हाण, वसंत गांवकर यांसह नागरिक यांनी घटनास्थळी धाव घेतली. तसेच मालवण पोलीस, नगरपरिषद कर्मचारी वं नागरिक मोठया संख्येने उपस्थित होते. या घटनेत मोठे नुकसान झाले आहे.
